Leksą i engelska
Eð wa fö femti å sę i Ǫsbymm. Ig minnes it ollt sos e war. Mitşi so i ser åv i fil, men sumt i rett o riktut.
Dşinggum i skaulam, i femmun. Addum byrt ǫ leso Engelska, för Elsa Wimelius. E wa wanlit finggum leksų, fem eld sjäks mieningger so uldum yvyrsett að engelsk. Ig wa nuäg min leksum, men Lars-Ierik, Timber-Ingemar o Digebjärgs-Olle wa wenest arvuge min leksum. Die willd olltiett skriev åv eð ig add gart. Teut saggd i frǫ, men die brygd it sig, etǫ skrieveð åv endǫ. Die tuäg skrievbuätşę main y skaulwäskun, dar addum rast.
I wiss int ur ig ulld bell inde ðiem skriev åv. Sę kam ig ǫ eð. Ig ulld dşäro leksų tuäkut! Nesta gaungg add i gart tau fil i werrum mieningg. Die tuäg skrievbuätşę o skrieveð åv ollt. Mes e wart leksförör, fikk Olle go framm a tavlun o skriev fuäst mienindşin. Elsa saggd ”Men Olle då!” og undres ǫ ur an add bellt fǫ til e so liuättuäkut. I wart funndisam, för i tykkt int e wa so fait min twä filstavningger.
Innǫ Elsa add rie aut ollt so wa fil min om-da stuttmienindşem, tykkt i synd umm Olle o wa liuätglað int ig add fai go framm. E wa tråy stufil, so ig add gart autǫ te witǫ umm eð. Lars-Ierik fikk o gå framm o skriev ien mieningg, men an add ju uärteð warna so an add retta til iettdie fileð.
Eteråt wa ðie jäloker, men i dugd fekla teut at wesst tråy filę, so Olle add råkað aut för, add i gart siuäv. Ig waist eð ig add skrievað ǫ mainum lapp, so ig add gemt i fikkun.
Sę war eð inndşin so willd skriev åv no mįer.