Bruäkrovę
E wa nosn i utę åv femtitalį. Dşinggum i skaulam i sjäkst klassem og ulldum fǫ pruäv ǫ planti tollplemtur ien ielan dag. E wa "friluftsdag" o Pemas-Wener, ien gamtkall so wa ainggd i tşäftem, add and um ųäran grupp. An instruireð uäs ur ulldum plantir.
Etter iet pa taim wart e kaffirast. Margareta waist ur ǫ såg aut frǫ attǫter. Ǫ add kumid að ien työwiðoruät eld ienum kwist min rovę, uppǫ no wis, o riwið uäl ǫ bruätşę attrǫ wistestşinkun. Rivǫ dşikk i winkel o war ien desimįete langg. Ǫ wa wenest brygd um bruätşę ulld fa sund mįer. Wene truä dyö. Ǫ war int no sikk i bruäkrovin. Bruätşę såt ju að.
An belld lågå bruätşę að ener, men dǫ fikk ǫ luv legg sig yvy knię onumes. Ǫ wa twiksam. Willdum ǫ ulld legg sig. Te ut gav ǫ minn sig. Wene såt ǫ ienum stungen. Ǫ dşikk daitað om o laggd sig yvy fuätą os.
Wene tuäg framm iet stuplåster y böem sainum o skar åv ien laguman bit. An saggd ǫ ulld ev upp rovę sain ögera. Sę kennd an etter u skarp stşinką enes war. Naj e dugd it, ǫ wa uvblot. Ǫ fikk luv spenn stşinku mjäst ǫ dugde. An rette til rivų, sett dait plåstreð o dremd til. Margareta yöpt til, men skwäpeð o luä mes ǫ protestireð. Wene miend e wa willdera fǫ ien duktigan smell eld flie smoa. Ǫ fikk luv ligg kwere. E war int ferdut enn. An byrd ǫ tryttş min tivlindşem mjäst an dugd muät ymsum dielum åv plåstrę. Sästşilt nuäg war an min kantum.
Etteråt wa båð ǫ o Wene liuätnögder o wįð oðrär og. Oller add ju aft ruälit o bruäkrovę jällt iel dan. Nogų blåmertş add ǫ naug faið ǫ stşinkų, men e brygd int ǫ sig umm.